KG INTERNATIONAL - Sai Kung, Clear Water Bay, Tai Mong Tsai, Village Apartment

地產新聞

樓市五節棍之代理七七上街施下馬威

(林木地) 2013年6月29日

第一棍：息魔埋身嚇窒業主

二手樓市成交好一陣唔好一陣，早輪市場氣氛受居屋白表買家刺激，但不久又受息口擔心上升，令個市發上發落，有業主心驚驚，準備減多些價沽貨亦不奇。
《阿爺報》稱，息魔陰霾嚇窒二手成交，中價樓買家多觀望10大屋苑四捧蛋。美國聯儲局明示退市時間表，預期美國明年中停止買債後，息口將於2015年開始回升，財爺曾俊華提醒，加息預期影響本港樓市，若大量資金流走，本港息率可能較美國更早上調。息魔降臨的擔心令買家卻步，周末區二手交投停止了升勢，轉而下跌。上周六、日，中原地產十大屋苑成交錄16宗成交，其按周跌27.3%。成交偏向細價樓為主，中價樓買家出現觀望情緒。

第二棍：公屋貴到冇譜

真係山雞變鳳凰，香港仔公屋賣到四百萬元，呢項公屋對住貝沙灣，有代理更話一點不貴，真係令人側目。
《生果報》話，華貴邨賣420萬稱王，造九成按揭，月入逾4萬才供得起。四百萬公屋樓王誕生無花假。座落港島南區的香港仔華貴邨，臨海岸線而建，不少單位擁有與「貝沙灣」同級的無敵海景，堪稱香港豪宅級公屋。華貴邨一個實用面積544方呎公屋戶，無懼政府辣招以高達420萬元驚天價易手，破盡本港歷來最貴公屋成交紀錄。

第三棍：代理七七上街施下馬威

呢個政府成日出招攪樓市，居然連美國退市，全球股市震盪亦唔理，地產市場交投少，代理行業洗牌，今次行業八大商會決定七月七日出來遊行，相信影響生計飯碗，連代理家人一齊出來一呼百應，將有一定聲勢俾個下馬威政府嘆嘆。
《阿爺報》指出，八大商會7．7遊行。「地產代理業界聯席會議」八大商會聯同多個各界團體，成立「辣招苦主大聯盟」，並決定7月7日與市民、社會各界、各行各業、地產代理行業等上街遊行示威。
大聯盟並提出五項訴求，包括：1.取消雙倍印花稅辣招；2.股東全部是香港永久居民的有限公司應豁免繳納買家印花稅；3.雙倍印花稅換樓期由6個月延長至12個月；4.放寬港人換樓置業按揭；5.全部辣招措施設立日落條款(到期時限)。

第四棍：華懋偷雞買將軍澳靚地

呢個樓市成交直插之際，又多個壞消息，政府低價賣出將軍澳地，個價同上次比較水瓜打狗，唔見一截，庫房收入又少一筆，仲攪到將軍澳同鄰近地區二手業主搶住減價賣樓。
《文人報》話，將軍澳臨海地兩個月跌價15％華懋30億投得每呎樓面地價3654元。美國退市陰霾籠罩，市場憂慮加息周期來臨，政府公布將軍澳68B1區，及屯門掃管笏55區兩地招標結果，其中將軍澳限量地由華懋以30億元「執死雞」投得，每呎樓面地價僅約3654元，不但低過市場預期下限近12%，更較今年4月會德豐（0020）投得的65C1 地低約15%，創近年區內售出的11幅地皮新低價。

第五棍：長樓花遠水難救近火

政府又有新招，今次將賣樓花期由原本二十個月，伸展至三十個月樓花期亦可申請賣樓，但行內話遠水對近火沒起作用外，充其量只幫地產商在樓市波動加快散咁些貨吧了。
《小超報》稱，樓花期延至30個月，用遠水增供應。政府循多方面增加房屋供應，受土地供應和建築期等限制，政府決定透過將樓花期由目前的20個月延長至30個月，變相增加中短期的一手供應。業界認為，新措施增加發展商推盤彈性，惟成效仍取決於政府能否加快審批預售樓花，以及目前一手市場能否吸引買家入市，否則只會成為虛招。